Zalonnak Chungin Himnak Lei Ah
Editor
Zalonnak asiloah luatnak cu sermi thil nung vialte nih kan herhmi le kan funhpanh cio mi asi. Zalonnak caah cun nunnak tiang pek zong ahau, kan luat khawhnak ding caah cun a lamkip in virhkholh le lautnak lam kawl cio asi. Zalonnak timi cu temtawntu um lo, hram hram le duhnaloin fial tu nawlneihnak nih uk lo le hruai lonak hmun hma, mah siarem tein khuasak lairel khawhnak ngeih, pumpak duh thim khawhnak ngeih hi asi.
Zalonnak ram a tu lio kan umnak korea ram bantuk liberal society nih a hruaimi ram biaknak zalonnak, ramkhel zalonnak le pumpak zalonnak hmun, pumpak pakhat cio i an nawlneihnak kha a thawng tuk tikah, pakhat le pakhat mamnehnak tuah le sual phawt awk a tha ti loh, nu le pa nih an chungchuak an fale zong an duhning in an cawpiak ngam hna loh an fale nih an duh lo ah cun. Mah bantuk zalonnak ah ngeimi ram le cozah tang ah khuasak asi tikah, zalonnak kan ngeihmi te hi zeitin dah kan hman lai tihi ruah a hau ve.
Relativism timi mah le ruahnak le pom ning poah a dik tiah ruahnak, cozah sianginn ah le sex education cawn chih asi, mahduhsahlam in cawl cang phung ning in . LGBT (rainbow wave) nih vawilei pi hmaiah zalonnak he a thudirnak nawl a ngei hoi.Secular timi pathian aherh loh, minung hi pathian kan si timi ruahnak. Noah Yuval Haris, Judah miphun asi mi, Oxford University ah Ph.D History in a dih, a tu hi Hebrew University of Jerusalem ah ca chimtu (professor) pakhat asi, a mah nih a chimmi cu, Biakamhlun i Pathian hi tuchun niah cun kan herh loh, science fim thiamnak nih airolh (replaced) cang a ti. Cultural maxism kalpi ning le ruahning ah biaknak phunglam cu minung an kan temtawntu phunglam asi ti khi asi hoi. Mah vialte hi kan van fum asi ahcun, minung nih zalonnak kan kawl ning le ka duh ning kan herhning cang pawl an si, zalonnak in zalonchinnak a duhmi kan si tikah, zalonnak hmunah kan um tikah, zalonnak kan neih mi nih rawlhralnak lei ah an kan kir pi than, zalonnak kan neihmi tu hi kan himnak caah hnam zia kan thiam a herh deuh. Isaiah Berlin nih cun zalonnak hi phun hnih ah a then, adeumi zalonnak nagative liberty “freedom from” temtawntu thil le dawnkhan tu thil in luatnak, pumpak i uk khawhnak telloin, mahduh sahlam in nun.adikmi zaloonak positive liberty “freedom to” nih a chim duh mi cu mah le mah i tei khawh i hruai or i uk, timhnak lei ah mah tein kal dawnkhan tu temtawntu pumsa duhnak i sum khawh le i timhnak goal (himnak) lei ah kal cuahmah kha asi. Temtawnnak le mamnehnak in zalonnak kan hmuh, zalonnak chung in um hi kan him dih tinak asi loh, kan himthainak ding caah a dikmilam le biatak lei ah kalnak caan tha kanneih lio tu asi. Kan mah duhthimnak ai tel lawngah kan him kho lai. Zeilam lei dah kan i thim lai?
Aluan cia kum 2000 lio ah Judah tlangval no, a zultu pawlnih ‘Rabbi” tiah an uah mi cawnpiak tu tha,vawlei serka in amah bantuk cawnpiaknak tha vawlei ah a phurtu a ho hmanh an um rih loh i, an mah Judah miphun pawl nih zalonnak diktak a hmuh khawhnak hnga le Rome cozah sinin zalennak an ngah khawhnak hnga le vawilei mi vialte caah zalonnak diktak kan hmuh khawhnak hnga caah kan zulh ding mi a van phurtu asi. Azultu hna sinah a chim mi hna cu “Keimah cu lam le biatak le nunnak ka si” (Johan 14:6) a ti hna, a dang a chimh than mi hna cu “ ka cawnpiaknak kha nan zulh ahcun a ka zultu taktak cu nan si, biatak cu nan hngalh lai i, biatak nih cun an luatter hna lai” (Johan 8:31-32) a ti than hna. Mah hi cawnpiaknak lawng hi kan caah zalonnak chungin himnak taktak cu asi.
