Editor Hmurka

Senri cazual nih lunglawm tein kan I don hna..

Ahmasabik ah kan biak pathian min kan thangthat. Damnak le thluachuahnak thawng in senri cazual zong kan thar chuah than khawh. Kum 16 chung thlafatintein rak chuah tawnmi senri cazual cu Covid zawtnak ruangah caan sau nawn chuah khawh loin um asi hnu ah, atu hi avoi khatnak tharchuah than in karhlan hram kan vak thok than. Thla thum dan ah voi khat in chuah kho ding hi kan timhtuahnak le kan hmuitimh cu asi.

Kan ca le kan holh kan nunphung kilkamh le thanchon khawhnak hi kan saduhthah le kan i hmaithlak pi mi cu asi. Kan ca tein ca tampi tial khawh kha a biapi mi cu asi ko. Pathian bia, Capar, lenhoi, biazai, capo nih chuak tibantuk le a dang dang mah le lung chuak mi poh tial khawhnak hmun asi. Ca tampi a tial tuding seino leng le val rual thatha kan in ngeih hna, voi nolh serni cazual ah nan neh nang hmuh ding kan i ruah chan ko. Kan khrifa buu cawl canghnak le i hruai ning kong he pehtlai in nan hmuhning le lungduh cio chim phuan khawhnak hmun cazual pakhat zong asi.

Tutan ah editor dir hmun hi kan hmai ka ah a hung chuak le zeiti cawlcangh ding hmanh ka thei ve loh, kei mah le kei mah hmanh edit an tuah kho mi ka si lo lio ah mah thil ka cungah a rak chuahtik ah ka lau khim. Editor dirhmun hi rian pical le rumra ngeingai khi kan si ter, kei mah cu editor le he pehtlaiin hmuhton mi ah ngei balmi ka si loh, editor bawmtu ti hmanh khi arim rua zong a hmim le a tep balmi ka si loh. Kan pi pu nih phung bia an chim theu mi cu “Mihar ah Dar al” an ti bang, ka hmai i chuakmi thilcu mitchimh kam seh buin kai awt ve phawt. Mirang te dawng nih “Tuah lengmangnak nih a thabik mi a chuahter ” tiah phung cu ser hna kaw, mah nih cu maw ka hna ah ngam ter deuh hnga ka ti.

Tulio kan ram boruak nih an kan nenh ning a faktuk ruang zong asi kho men, ca bia lei ah kan chan bau ngai, mah lak ah zaanghlei cawi in ca bia a van kan tialpiak tu lei a tlamtlinnak ding caah a ka kip in bawmtu kan hawi le nan cungah lunglomhnak chim cawk lo kan ngei ko, nan mah thawng in tutan senri cazual kan van chuahkhawhnak asi. Senri cazual dawttu zong an i lawm ve lai.

Kan cachuahmi ah tlamtlinlonak a tam lengluang lai, i theihthiamnak tu nih hmailei ah tlamtlin seuh in kar kan hlan pi in kan bawm ko seh.